Simbahan sa Loon aduna nay opisyal nga marker isip nasudnong landmark sa kasaysayan

ADUNA nay opisyal nga marker ang simbahan sa Loon isip usa ka nasudnong landmark sa kasaysaysan sa Pilipinas.

Gitukas ang National Historical Landmark marker sa Our Lady of Light Church didto human ang usa ka misa pinangunahan mismo ni Obispo Leonardo Medroso.

Ang halandumong kalihukan natunong sab sa pagbisita sa kadagkuan sa National Historical Commission of the Philippines sa simbahan sa Baclayon nga gideklarar nga National Historical Treasure.

Ang pag-instalar sa marker sa simbahan sa Loon gitambongan sab ni Gob. Edgar Chatto ug opisyales sa lungsod pinangulohan ni Mayor Lloyd Peter Lopez kinsa tsirman sa Municipal Council for Culture, Heritage and the Arts.

Kini laing pagmatuod di lang sa kabahandi-anon sa kultura sa Bohol apan sa pagtunhay sa Kristohanong pagtoo isip pwersa nga nagtabang sa paghulma sa Bol-anong kasaysayan.