Himoon sa Bohol ning adlawa ang rehiyonal nga consultative meeting sa Departamento sa Agrikultura

IPAHIGAYON sa Bohol Agricultural Promotions Center ning adlawa ang rehiyonal nga consultative meeting sa Departamento sa Agrikultura.

Kini tambongan sab sa mga tigpasanay og binhi sa humay aron matino ang kinatibuk-ang kahimtang sa ilang industriya karon.

Tambongan ni Gob. Edgar Chatto ang tigum kon maapas sa iyang schedule o kaha representahan siya nila ni OIC Provincial Agriculturist Larry Pamugas ug seed coordinator Lorvien Lagapa.

Matud ni Agriculture Regional Director Ricardo Oblena mahinungdanon ang kontribusyon sa Bohol sa industriya sa humay gumikan sab sa mga maayong inisyatiba sa probinsiya.

Ang tigum gitumong sab sa paghugpong sa mga kooperatiba ug kapunongan sa mga tigpasanay og binhi sa humay sa Tunga-tungang Kabisay-an.