Makadawat og P25,000 nga bonus ang matag kawani sa kapitolyo

MODAWAT og labing menos P25,000 ang matag kawani sa kapitolyo gawas sa naandan nilang suweldo, 13-month pay ug ubang benepisyo.

Lakip nga makapahimus sa maong bonus ang mga kawaning co-terminus ug plantilla casual kay sama sa mga regyular ang benepisyo nga ilang madawat..

Atol sa convocation program sa kapitolyo kaganihang buntag, gipahibawo sab ni Gob. Edgar Chatto nga adunay labing menos P5,000 nga bonus ang matag kwalipikadong job order casual ug kontraktuwal.

Apil sa P25,000 nga bonus sa regyular nga mga kawani ang P5,000 nga Collective Negotiation Agreement (CNA) bonus nga wa gyud ihatag ngadto kanila sud sa tulo ka termino sa nilabayng administrasyon sa probinsiya.

Ang una ug katapusang CNA bonus gihatag niadto pang panahon ni kanhi gobernador ug karon Kong. Rene Relampagos kansang bise gobernador niadtong higayona mao mismo si Chatto.