Nakadawat og ayuda sa probinsiya ang usa ka barangay nga kahibulongan

NAKADAWAT og ayudadng pinansiyal para sa komon nga eskwelahan sa usa ka nasuok nga barangay nga duhay lungsod.

Gihatud mismo ni Gob. Edgar Chatto ug Bokal Romulo Cepedoza ang ayuda para sa kompyuter ug makina sa panahi sa barangay Dagnawan Integrated School nga adunay elementarya ug hayskul.

Ang Dagnawan usa ka barangay diin ang mga molupyo gawasnon nga makapili kon sa Sagbayan o sa Inabanga ba magsakop.

Gani aduna sab kini komon nga multi-purpose building nga ang katunga barangay hall sa Dagnawan, Sagbayan ug ang pikas baangay hall sa Dagnawan, Inabanga.

Ang pagtunol sa ayudang pinansiyal gisaksihan sa kadagkuan sa Sagbayan, ingon man managlahi nga opisyales sa barangay sa napikas nga Dagnawan ug mga magtutudlo sa integrated school

Didto sab si Padre Pablito Saludes kinsa kanhi pari sa Dagnawan ug maoy nanghingusog nga matabangan ang katawhan didto pinaagi kang Chatto. Kadto maoy labing unang pagtaak sa gobernador sa talagsaong baryo sa Bohol.