Gob. Chatto mopalanog iyang unang State of the Province Address sa sesyon sa hunta probinsiyal karong buntag (Biyernes)

IPALANOG ni Gob. Edgar Chatto sa sesyon sa hunta probinsiyal karong buntag (Biyernes) ang labing una niyang State of the Province Address (SOPA).

Hisgotan sa labing taas nga opisyal sa lalawigan ang mga nasugdan na niya, kasamtangang gipatuman, ug gilatid nga buhaton ning tuiga nunot sa estratehiyang HEAT Bohol o Health and sanitation, Education and technology, Agriculture and food sufficiency, ug Tourism and livelihood.

Iladlad sab sa gobernador ang ubang programa ug proyekto nga nasubay sa kinatibukan niyang slogan sa panerbisyo nga LIFE HELPS o Livelihood, Infrastructure, Food, Education, Health, Environment, Leadership development, Peace and order, ug Sports and youth development.

Kusog nga dasigon ni Chatto ang katawhan sa pagpakabana tumong sa malungtarung kalambuan kay hugot ang iyang pagtoo sa liderato nga nagtamud sa partisipasyon ug kolaborasyon.

Alang kaniya ang matuod nga lider ning panahona mao kadtong makama-ong mogiya nga mabai-d ang mga mapuslanong katakus sa uban.

Ibandera ning tuiga sa administrasyon sa ika-25 nga gobernador sa Bohol ang temang “Bohol sa 2011: Mauswagon ug Malipayon.”

Si Chatto makigtagbo sa prensa sa iyang senemanang Kita ug Ang Gobernador sa di pa mosirit sa Sangguniang Panlalawigan Session Hall sa kapitolyo alang sa iyang State of the Province Address.