PORMAL nga gibuksan sa Bohol Cultural Center kagahapon (Lunes) ang Buwan sa Arte pinaagi sa mini-fashion show sa mga sapot nga Bol-anon sa karaan nga panahon.
Matud ni Gob. Edgar Chatto makahuloganon ang usa ka buwan nga selebrasyon kay kini naatol sa ika-20 nga Philippine International Arts Festival sa temang “Bunga sa Arte.”
Karong adlawa, Martes, ilusad ang pagbisita sa mga estudyante sa nagkalain-laing tulonghaan ngadto sa museo sa lalawigan sa tibuok buwan sa Pebrero
Ugma (miyerkoles) mao ang premiere showing didto sa ICM sa pelikulang Amigo nga gililas sa Bohol ug lakip nga gibitoonan sa mga lokal nga talento.
Ang ubang kalihukan sa Arts Month mao ang bangga sa sinuwatay sa balak nga “My Bohol, My Poetry” sa pinulongang Ingles sa Pebrero 14 ug “Akong Bohol, Akong Balak” sa Binisaya sa petsa 15; workshop sa tarsier woodcarving ug Boholano design pottery painting, petsa 16-18; HEAT Bohol Arts Caravan ngadto sa lungsod sa San Isidro, petsa 21; Pinuga sa Hunahuna Art Exhibit, petsa 23-26; ug music seminar workshop para sa mga magtutudlo sa MAPEH sa DepEd-Bohol Division sa petsa 26-27.
No comments:
Post a Comment